Үги ана яфрагы һәм чәчәге файдасы

Яфракларын кырау төшә башлаганчы җыялар. Чәчәге, яфрагы, тамыры — һәммәсе дәвалау үзлегенә ия. Үги ана яфрагы ашказанын төзәтер һәм куәт бирер. Шулай ук бизгәк тотканда тирләтер һәм ютәлгә, күкрәк авыруларына, үпкә һәм эч шешкәнгә файдалы. Үт кутырыннан котылу өчен үги ана яфрагын чәй кебек эчеп авыруны эчтән куалар. Тышкы авырулар булганда яфрагын ябалар. Яфрагын киптереп чәй кебек эчсәң, ютәлгә һәм сулыш тарайганда, бизгәк тотканда шифасы күп. Шешләргә һәм җәрәхәтләргә япсаң да бик файдалы үлән. Яшел яфрагын һәм тамырын алып, шунда ук суын сыгып (сок ясап) һәр көнне ике мәртәбә берәр аш кашыгы эчсәң үт кутырына һәм туберкулез авыруына, үпкә җәрәхәтләрен дәвалауда шифасы тияр.

Ветеринарлар үги ана яфрагын мал йөткергән вакытта печәнгә яки солыга кушып ашаталар.

Якты юл

Алина Кондратьева фотосы