Розалар кышка ничек әзерләргә

Хәзер розаларга фосфор һәм калий кирәк. Фосфор розаларны чәчәк аттыра, чөнки розалар октябрьгә кадәр чәчәк ата. Шуңа өстәп үсемлекнең иммунитетын яхшырта. Калий ботакларын өлгертә. Тиешенчә өлгермәгән яшел ботакларның суыкка чыдамлыгы түбәнрәк. Һәр төпкә берәр уч көл салып чыгыгыз. Сентябрь башында һәм сентябрь азагында ике тапкыр 10 л суга 1 аш кашыгы суперфосфат һәм 1 аш кашыгы калий сульфаты кушып, һәр төпкә 3әр л эремә сибәргә була. Шуннан соң бернинди тукландыру булмаска тиеш.

Розаларның шиңгән чәчәкләрен гел кисеп торыгыз. Шул ук вакытта корыган, чир билгеләре булган яфракларын да кисәргә кирәк. Чүп үләннәрен утагыз.

Көз башыннан розаларга су сипмиләр. Дым күп булганда аның ботаклары кышка начаррак әзерләнә, өлгереп җитми.

Сентябрь урталарыннан үрмәләп үсә торган розаларны җиргә бөгә башлыйлар.

Быел яңгырлар еш ява. Ончыл чык, башка гөмбәле чир билгеләре булса, зарарланган яфракларын кисеп, «Фундазол», «Скор» кебек фунгицид белән эшкәртергә кирәк. Үсемлек чирләргә каршы көрәшеп хәлсезләнмәсен.

Йорт.Бакча.Рецептлар.