Питрау атнасында яңа керәшен гаиләсе туды

Шушы көннәрдә Зәй районының Сарсаз Баграж егете Илья Абдулов белән күрше Урта Баграж авылы кызы Римма Кондрабаева кызыл туйларын билгеләп үттеләр. 

Яшьләрнең мәхәббәт тарихлары бик кызыклы, алар бер-берсен инде мәктәп елларыннан ук беләләр. 

"5нче класста бергә укый башладык. Ммәктәптә алай бик игътибар итмәдек бер-беребезгә, классташлар булып кына йөрдек. Ә менә мәктәпне бетереп, авылга кунак булып кайткач, янәдән күрешеп, бер-беребезгә гашыйк булдык", — дип сөйләде Римма. 

Илья белән Римма 5 ел очрашып йөргәннәр. Римма Ильяны армиягә озатып, көтеп ала. Армиядән кайткан көнне үк, перронда Илья сөйгәненә кияүгә чыгарга тәкъдим ясый, шул көннән туйга әзерлек башлана. 

Йолаларга туры китереп, Римманы туган йортыннан йолып алганнар, кияү йортына килен төшерү йоласы да үтәлгән. 

"Туебыз заманча, бик күңелле узды. Барысыннан да канәгать калдык", — диде кәләш. 

Яшьләргә гаилә бәхете, саф мәхәббәт теләп калабыз!