"Питрау" ансамбле Мәскәүгә барырга җыена

Алар узган ел Свияжскида узган "Бәрмәнчек бакчасы" керәшен фестивалендә катнашкан, ә быел Казанда булган "Без бергә" Республика балалар сәнгате фестивалендә чыгыш ясап, Гран-при отканнар, шулай ук Әлки районында узган "Әйлән-бәйлән" милли уеннар фестивалендә дә сынатмаганнар.

"Россиякүләм, республикакүләм фестивальләрдә катнашырга тырышабыз, балаларның халкыбызның гореф-гадәтләрен, җыр-биюләрен белүе үзе бер шатлык, ансамбльгә дә бик теләп, яратып йөриләр", - ди сөенеп, җитәкчеләре Людмила Адамова. 14 июльдә Мамадыш районының Җөри авылында Питрау бәйрәменең пролог өлешендә катнашып, славут әйткәннәр. "Питрау" ансамбле 5 августта Казан Кремлендә үтәчәк "Иске Казан түгәрәк уены" фестиваленә барырга җыена икән. Быел Чаллыда үткән "Талантлы Россия" телевезион фестивалендә җиңгәч, аларга 9 сентябрьдә Мәскәүгә "Шәһәр көне"нә барырга чакыру килә. Монда ансамбль кичке уен күрсәтергә планлаштырган. "Балалар иман көйләре дә беләләр. Мәскәүгә бик тә барасылары килә, һәм без моны һичшиксез оештырырбыз", - ди Людмила Адамова. "Питрау" ансамбленә киләчәктә дә зур уңышлар юлдаш булсын, биектән-биек үрләр яуларга язсын.