Балагыз мәктәптә укыса, белеп тору комачауламас

Январь башындагы суыклар аркасында, яңа ел каникуллары быел берничә көнгә озаккарак сузылды. Әле алда февраль суыклары, шуңа күрә алга таба балаларны мәктәпкә дәресләргә җибәрү-җибәрмәүне хәл итү өчен, һава температурасының ничек булырга тиешлеген белеп тору ата-аналарга комачауламас.

Татарстан мәгариф һәм фән министрлыгы мәгълүматы буенча, авыл мәктәпләрендә кыш көне һава температурасы 23 градус һәм аннан да түбәнрәк булганда – башлангыч класс, 25 градус һәм аннан да салкынрак булса – V-IX класс, 30 һәм аннан да суыграк булган очракта X-XI класс укучылары укымый.

Шәһәр мәктәпләрендә бераз башкачарак: көн 25 градус һәм аннан да салкын торганда – башлангыч класс балалары, 27 градус һәм тагын да түбәнрәк булса – V-IX класс, ә инде 32 градус һәм аннан суыграк булганда X-XI класс укучылары өчен дә дәресләр булмый.

Кышкы зәмһәрир суыкларда балаларның өйдә утырулары үз сәламәтлекләре өчен үк яхшы икәнен һәр ата-ана белеп торырга тиеш.

Фото: i-geb.de