Хуҗа Хәсәндә төбәкара дуслык бәйрәме булды

Баштан ук спорт мәйданында җылы атмосфера булган. Кунакларны һәм катнашучыларны самовардан кайнар чәй һәм хуш исле коймак белән сыйлаганнар. Кешеләр аралашып, көлешеп фотога төшкәннәр, ә балалар ачык һавада уйнаганнар, татлы бүләкләрдән авыз итеп, канәгать калганнар.

«Бу спорт бәйрәме туган авылдан гына түгел, ә күрше авыллардан һәм хәтта башка төбәкләрдән дә командаларны җыйды, чын мәгънәсендә әйләнә-тирә өчен мөһим вакыйгага әйләнде. Турнирда Хуҗа Хәсәннән ике команда, шулай ук, Турминское, Янсурино, Иске Тәрбит авылларыннан командалар катнашты. Чувашиянең Чүти командасы махсус кунак булды, бу ярышларга төбәкара масштаб бирде»,  – дип хәбәр иттеләр хуҗахәсәнлеләр.

«Командалар  чыккач, чын спорт ярышы башланды. Һәр туп, һәр очко өчен көрәш барды. Беркем дә оттырырга теләмәде. Уеннар шулкадәр мавыктыргыч булды, финал очрашуны инде караңгыда үткәрергә туры килде.

Финалда Хуҗа Хәсәннең үз командасы һәм Иске Тәрбитнең көчле спортчылары очрашты. Көрәштә турнир хуҗалары җиңү яулады, җиңүгә омтылышларын һәм уенның килешле булуын күрсәттеләр.

Турнир призерлары:
1нче урын — Хуҗа Хәсән авылы волейболчылар командасы
2нче урын — Иске Тәрбит
3нче урын — Турминское

Һәр команда грамота һәм истәлекле бүләкләр алды. Әмма төп бүләк булып эмоцияләр, спорт азартлылыгы һәм, әлбәттә, яңа дуслык мөнәсәбәтләре булды. 

Катнашучылар һәм кунаклар чараны оештыручыларга – Ольга һәм Денис Матвеевлар гаиләсенә аерым рәхмәт белдерделәр. Аларның тырышлыклары белән бәйрәм бик уңышлы узды. Матвеевлар авыл тормышында актив катнашалар, чаралар оештыралар, спорт һәм мәдәни инициативаларны хуплыйлар.