Түбәнкамалылар Олы көнгә әзерлекне башлады

Түбәнкамалылар районкүләм Олы көн (Пасха) бәйрәмен быел Нариман авылнда уздырырга җыеналар (узган ел ул Балчыклы авылында булган иде). Шул уңайдан, җирле керәшен оешмасы җитәкчесе Тамара Баһаветдинова, оештыру комитеты белән берлектә, Нариман авылында беренче күчмә киңәшмә уздырды. Нариман клубындагы музейда булып, андагы миллилекне чагылдырган экспонатлар белән таныштылар.

Олы көнне быел да зурлап, райондагы фольклор коллективлары, активистлар һәм халык катнашында уздыру күздә тотыла. Һәрвакыттагыча, халык Олы көнгә бәйле йолаларны, уен-җыруларны күрәчәк.

Пасханы бәйрәм итү көне билгеләнде. Ул 20 апрельдә 11 сәгатьтә Нариман авылы клубы янында булачак.