Сәйтәклеләр «Капка төбендә» урам концертына җыелган

Һәр милләтнең үз традицияләре һәм бәйрәмнәре бар. Аларның күбесе борынгы заманнардан ук килә. Без тизлек заманында яшибез, шуңа да, борынгылар гына түгел, хәтта үзебезнең әти-әниләр буыны уздырган бәйрәмнәр, йолалар турында да белмибез диярлек.

Менә шуңа күрә дә, Сәйтәк мәдәният хезмәткәрләре хәзерге яшьләрне, авылдашларын элгәреге бәйрәмнәр, уеннар белән таныштыруны үзләренә максат итеп куйдылар. Шул максатны тормышка ашырып, шушы көннәрдә авыл халкын «Капка төбендә» дигән бәйрәмгә җыйдылар.

«Шунысы куанычлы , өлкән яшьтәгеләр бик азга гына булса да, үзләренең яшьлекләренә әйләнеп кайткандай булдылар. Чөнки алар чорындагы уеннар, җыру-биюләр искә төшерелде. Элекке вакытларда авылда күрше-тирәнең кичләрен берәр йорт капкасы төбенә җыелып, сөйләшеп, күңел ачып утыру гадәте булган. Без шуны яңарттык. Әле алай гына да түгел, өстәлләр алып чыгып табын кордык, сыйландык. Яна Шалаумова һәм Надежда Тубалова җырлаганда, халык аларга кушылып җырлап утырды. Авылдашларга шундый матур бәйрәм бүләк итә алуыбызга шатланабыз», – дип яза оештыручылар.

Фотолар: Без бит Сәйтәктән төркеменнән