Республикакүләм Питрауда лаеклы карендәшләргә Татарстан Рәисе бүләкләр тапшырды

XXVII Питрау керәшен культурасы бәйрәмен ачу тантанасында Татарстан Рәисе бер төркем актив карендәшләргә хөкүмәт бүләкләре тапшырды.
 

Рухи-әхлакый традицияләрне саклауга һәм үстерүгә, конфессияләр арасында татулыкны һәм тынычылыкны ныгытуга мөһим өлеш керткәне өчен “Татарстан Республикасы алдындагы казанышлар өчен” орден медален журналистика ветераны Виктор Шадрин алды.
* * *
Мәдәниятне үстерүгә керткән өлеше, күпьеллык нәтиҗәле хезмәте өчен, Татарстан төбәк керәшен иҗтимагый оешмасының идарә члены Мария Михайловна Семёнова "Фидакарь хезмәт өчен" медале тапшырылды.
* * *
Татарстан республикасының социаль-икътисад потенциалын ныгытуга керткән өлеше һәм күпьеллык нәтиҗәле хезмәте өчен, Мамадыш районы җирле ветеран оешмасы члены Гөлфинур Зәйнулловна Дуваловага "ТАССР төзелүгә – 100 ел" медале бирелде.
* * *
"Татарстан Рспубликасының атказанган артисты" дигән мактаулы исемгә, музыка сәнгатен үстерүдәге хезмәтләре өчен, "Ак Барс Арт" иҗат берләшмәсе җырчы-вокалчылары – Лариса Басыйрова, Татьяна Ефремова, Радик Шәрипҗанов; хореография сәнгатен үстерүгә керткән зур өлешләре өчен, "Ак Барс Арт" иҗат берләшмәсе артисты Григорий Сергеев, "Бәрмәнчек" керәшен дәүләт фольклор ансамбленең балет артисты Дмитрий Тачаев лаек булдылар.
* * *
Мәдәниятне үстерүдәге зур өлеше өчен, "Татарстан Республикасының атказанган мәдәният хезмәткәре" дигән мактаулы исем Алабуга шәһәренең А.С.Пушкин исемендәге үзәк китапханәсе рәссам-бизәүче Виктор Александрович Селивёрстовка бирелде.
* * *
Мәгариф өлкәсендәге хезмәте өчен, "Татарстан Республикасының атказанган укытучысы" дигән мактаулы исем Казан шәһәрендәге 181нче мәктәбенең туган теле укытучысы Николай Валентинович Максимовка бирелде.
* * *
Финанс-икътисад эшчәнлегендәге казанышлары өчен, "Татарстан Республикасының атказанган икътисадчысы" дигән мактаулы исем "Ак Барс" банкының Питрәч районындагы беренче өстәмә офис җитәкчесе Лидия Ильинична Пронинага тапшырылды.
* * *
Мәдәниятне үстерүгә керткән өлеше, күпьеллык нәтиҗәле хезмәте өчен, Татарстан Рәисенең Рәхмәте Мамадыш район мәдәният йорты методисты Роза Павловна Галкинага белдерелде.