Павел әтей Чурашов Людмила Белоусова турында: «Безне халыкның рухи традицияләрен яңарту берләштерә»

— Людмила Даниловна белән без 2000 еллар башында, отец Павел Павлов җитәкчелегендә «Новый завет»ны керәшенчәгә тәрҗемә итү буенча эш башланганда таныштык. Тәрҗемә белән шөгыльләнергә тиешле комиссия төзелде. Керәшен священниклары, активистлар, галимнәр, тел белгечләре — бу өлкәдә эшли алучы кешеләр бу проект турында фикер алышу өчен җыелдык. Людмила Даниловнаны беренче мәртәбә шунда күрдем. Миңа, ничектер, бу эштән читкәрәк китәргә туры килде. Башлыча, проект өстендә отец Павел, минем әти Михаил Чурашов, тәрҗемәсе Маря Матвеева һәм текстлар редакторы, туган телне яхшы белүче буларак, Людмила Белоусова эшләделәр. 

Людмила Даниловна — харизмга ия позитив кеше, керәшеннәр өчен күп эшли. Аның белән аралашуы, эшләве җиңел. Безне бер максат — халыкның рухи традицияләрен яңарту берләштерә. Я. Емельянов исемендәге культура үзәгендә, аның җитәкчелегендә яңа инициативалар, яңадан-яңа проектлар тормышка ашырыла. Ходай аңа киләчәктә дә сәламәтлек бирсен. Тормышта үз алдына куйган максатларына ирешеп, хезмәтләре һәм казанышлары белән, карендәшләрне шатландырып яшәсен.