«Нур» ансамбле фестивальдә керәшен җыр-биюләрен тәкъдим итте

Татарстанда ветераннар арасында үзешчән башкаручылар «Балкыш» («Сияние») фестиваленең сайлап алу этаплары бара. Чараны Татарстан республикасы ветераннар (пенсионерлар) региональ иҗтимагый оешмасы үткәрә.

«Фестивальне, гомумән, теләсә кайсы проектны үткәрү, беренче чиратта, республика Рәисе Рөстәм Миңнеханов тарафыннан хуплана», — диде ТР ветераннар (пенсионерлар) оешмасы рәисе,  фестивальне оештыру комитеты рәисе урынбасары Хәбир Иштирәков.

Фестивальнең конкурс өлеше 11 номинация буенча үткәрелә: ялгыз җырлау, вокаль ансамбль, вокаль-инструменталь ансамбль һәм башкалар.

«Азнакайда узган әлеге фестивальнең беренче турында шәһәрнең «Нур» ансамбле дә катнашты. «Нур» ансамбле Россия Халыклары бердәмлеге елы уңаеннан төрле халык культурасын күрсәтте: керәшен, татар, рус, чуваш», — дип сөйләде республика керәшен иҗтимагый оешмасы члены Валерий Тимиряев.