Мамадыштагы «Безнең ишегалды» фестивалендә карендәшләребез дә катнашты

Фестивальгә килүчеләрне керәшен, татар, рус, удмурт һәм мариларның милли фольклор коллективларына йөрүчеләр үз җырулары белән каршы алды. Районның Владимир, Дүсмәт, Комазан башы, Шәдче һәм Җөри авылларының керәшен фольклор ансамбльләре җыелма коллектив буларак чыгыш ясады. Һәр халык үз милли ризыклары куелган табын да әзерләгән иде. Яшьләр дә, олылар да тәмле камыр ашларыннан авыз итте, төрле уеннарда, мастер-классларда катнашты.

Фестивальнең «Юбилейный» спорт комплексындагы рәсми өлешендә җитәкчеләр чыгыш ясады. Аерым алганда, район башлыгы Вадим Никитин «Безнең ишегалды» программасы буенча районда 59 ишегалды (13е — авыл җирендә) төзекләндерелүен әйтте. Быел район республикакүләм 48 программада катнаша. Шул программа буенча, мәктәпләрдәге туклану блокларында, хәрби комиссариат бинасында, район мәдәният йортында — барлыгы 100 социаль объектта төзелеш һәм ремонт бара.

Үз чиратында, Анатолий Иванов шәһәрне төзекләндерү конкурсларында мамадышлыларның күп еллар дәвамында катнашуын, республикада беренчеләрдән булып, Мамадыш шәһәре читендәге Нократ елгасы ярының төзекләндерелүен һәм халыкның яраткан ял урынына әйләнүен искәртте. Республика программалары ярдәмендә, халык тормышы өчен әһәмиятле башка урыннар да төзекләндерелгән. 
Татнана барышында, «Безнең ишегалды» программасын тормышка ашыруда актив катнашкан кешеләргә Татарстан Рәисе Рөстәм Миңнехановның Рәхмәт хатлары тапшырылды. 

Билгеле булганча, бу программа, халыкка уңай тормыш шартлары тудыру максатыннан, Татарстан Рәисенең һәрьяклы хуплавы белән, 2020 елдан гамәлгә ашырыла. Биш ел эчендә республикабызда 5 меңнән артык ишегалды өр-яңадан үзгәртеп ясалган.

Фото: Мамадыш-информ