Мамадыш районы Владимир авылында чираттагы «Авыл көне» гөрләп узды

Оештыручы Галина Михайлова, Валерий һәм Римма Ивановлар, нәфис сүз һәм җыр осталары - Ольга Чемкина, Венера Нислина, Мария Юзеева, Клара Михайлова, быелгы «Керәшен чибәре» номинанты Кристина Грибакова һәм башка бик күпләр чыгыш ясады.

«Талир тәңкә» кызларына, пылау пешереп, самавырда чәй кайнатып торучы егетләргә, алдан мәйданны әзерләп куйган авылдашларга, матди ярдәм күрсәткән спонсорларга халык гөрләтеп кул чапты. 

Мамадышта яшәүче тегүче туганыбыз Альбина Горбунова шушы бәйрәм өчен туганнарга дип, күлмәкләр тегеп кайткан. Этностильдә керәшен күлмәкләре элементлары кертеп тегелгән күлмәкләр киеп чыктык бәйрәмгә. Үзебезгә дә бик ошады, хатын-кызлар да комплиментлар яудырды: «Кайда тектердегез? Миңа да кирәк!»  диючеләр күп булды.

Туганнарыбыз исеменнән Альбина Викторовна Горбуновага матур бәйрәмне тагын да ямьләндергәне өчен зур рәхмәт әйтәбез.  Аның кебек инициатива күрсәткән кешеләргә сокланам инде мин. 

Бәйрәмнең матурлыгы аны оештыручылардан гына түгел, халыкның үзеннән дә тора шул. 

Лидия Пасыева.

Фото: Айгөл Мөбәрәкшина.