Лена Данилованың тәүге китабы дөнья күрде

Елена Данилованың борынгы уен коралларында көйләр башкару осталыгын күпләр белә. Аның һәр чыгышы «Бәрмәнчек» концертларын матурлык һәм тирән мәгънә белән тутыра. Шулай ук, Елена Михайловна керәшеннәрнең халык җыруларын башкарганда да үз осталыгын күрсәтә.

«Гөргөри кияүләре +» музыкаль спектаклендә уйнаган Палый әби ролендә дә ул үзенең ихласлыгы һәм таланты белән тамашачыларның күңелен яулаган кеше.

Ә шушы көннәрдә аның Ватанга һәм халыкка мәхәббәт белән тулы шигырьләр китабы дөнья күрде. Бу хакта автор үзенең ВКонтаекте социаль челтәрендә хәбәр итте.

55 яшьлек юбилеем ничә "5"лелек булды соң әле дип уйлап утырдым да, төгәл нәтиҗә чыгарып та куйдым: "Кругом биш!" Туган-тумача, дус-иш, коллегаларымның җылы котлауларына тәүге китабымның, ниһаять, юбилеема чыгып җитүе ямь өстенә ямь булды, – дип язган автор.

Елена Григорьева-Данилованың иҗаты күпләрне сокландыра. Язылган шигырьләренең хисабы юк. Шуңа, без аңа уңышлар, киләчәктә тагын күп китаплары басылуын, иҗатының саекмавын телибез.

Фотолар Елена Григорьева-Данилованың ВКонтакте битеннән алынды.