Күңел җылысын алган элгәреге сандык малы

Әлеге тастымалны Мамадыш районының Колышчы авылы осталары суккан. Рәт йору вакытларында аш-суларда кунаклар алдына салына торган махсус озын тастымал. Хәзер аларны кечкенә салфеткалар алмаштырды. Элек 7-8 кешегә бер озын тастымал булган.

Хатын-кызлар үз эчендәге, күңелендәге бар матурлыкларын, җылылыгын, уй-хисләрен күбрәк шул бистәрләргә биргәннәрдер, мөгаен. Өй чүпрәкләре арасында иң матурлары, үзенә тартып торучылары, тормышта иң күп кулланылганнары шул бистәрләр бит. Ниндиләрен генә сукмаганнар, ниндиләрен генә чикмәгәннәр безнең әбиләребез. 

Гади генә итеп, буй-буй сугылган кызыл башлы бистәрләр – көндәлек бит-күз, баш-тән сөртергә дип әзерләгәннәр. Кыска гына итеп, буй-буй сукканнарын тастымал дип йөрткәннәр, алары кул, савыт-саба сөртергә, капларга әзерләнгән. Әле тагын махсус сугылган озын тастымаллар булган. Алары аш-су вакытында алга ябу өчен (кунаклар өчен) әзерләнгән.

Савыт саба, кул сөрту очен суккан кондәлек тастымаллар.

Хатын-кыз үзенең күңел җылысын, изге теләкләрен кулы аша шушы бистәр-тастымалларга күчереп, башкаларга җылылыгын өләшкән. Фәнни телдә әйтсәк, уңай энергиясен. Шул җылылык кешеләрне бер-берсенә якынайткан, җыйган, туплаган.