Көрәшчеләр Роман һәм Булатның яңа уңышы

Татарстанның атказанган спорт остасы, дөнья чемпионы Ильяс Галимов истәлегенә оештырылган бу ярышта Роман белән Булат 85 килограммга кадәрге авырлык үлчәвендә финалга барып җиттеләр һәм беренче-икенче урыннар өчен бил алыштылар. Бу очрашу аеруча киеренке булды, кемнең җиңәсен фаразлавы кыен иде. Ахыр чиктә, Роман бер генә балл өстенлек белән җиңү яулады, ә Булат икенче призлы урынны алды.

Бу турнирда Татарстан шәһәрләреннән һәм районнарыннан, шулай ук, Башкортстаннан һәм Оренбург өлкәсенең Богырыслан (Бугуруслан) шәһәреннән барлыгы егерме бер команда катнашты. Ярышта Әлмәт командасының зур өстенлек белән җиңеп чыгуына карендәшләребез Роман белән Булат лаеклы өлеш кертте.

Әлмәт районының Кәләй авылы егете Роман Спиридонов һәм Зәй районының Сәвәләй авылында туып-үскән Булат Москов хәзерге вакытта Әлмәт политехник техникумында укыйлар. Роман – нефть җайланмалары операторы, ә Булат автомеханик булырга әзерләнә. Кичләрен танылган тренер Фәнил Минһаҗев җитәкчелегендәге көрәш секциясендә шөгыльләнәләр. Бу керәшен егетләре инде күп кенә дәрәҗәле ярышларда җиңүгә ирешеп, Россиянең спорт остасы исемен алу өчен кандидат нормативын да үтәгәннәр. Көрәш келәмендә генә көндәшләр, ә тормышта аерылгысыз дуслар булган Роман белән Булатка уңышлар гына юлдаш булсын.

Виктор ШАДРИН,

турнир комментаторы.

Фотоларда (сулдан уңга): Роман Спиридонов һәм Булат Москов; егетләрнең көрәш мизгеле.

Автор фотолары.