Казаклар Чаллысыннан Яков Андреев үз һөнәренең бар нечкәлекләрен белеп, җаваплылык тоеп эшли

Аның эше җитди һәм куркыныч, һәркем башкара алмый. Кеше характерына барлык сыйфатлар да бик иртә яшьтән үк салына. Аларның нәселен район халкы яхшы белә. Алар әле дә районның легендар җитәкчеләре Андрей Васильевич Степановны һәм Василий Афанасьевич Чебаковны зур хөрмәт белән искә алалар.

Бәлки, шуңа күрә дә 35 ел элек район газ хезмәте начальнигы булып эшләгән Шамил Закиров, бу тырыш гаиләдә тәрбияләнгән Яковны үз коллективына чакыргандыр. Чөнки газ белән бәйле җаваплы эшкә очраклы кешеләрне алмыйлар. Күрәсең, ул безнең районны масштаблы газлаштыру башлануын күздә тоткан. Район үзәгенә эшләргә килергә риза булган Яков Андреевны җитәкчеләр Казан шәһәрендәге уку үзәгенә кыска сроклы курсларга җибәргәннәр. Кайткач, ул бригада составында үз һәм күрше авылларны газлаштыруда катнашкан. Әлбәттә, моның өчен, озын чиратларда торып, шәһәрдән торбалар китергәннәр. Аннан соң гына эшкә тотынганнар.

Ул вакытта авылдашлар һәм район халкы «газовик»ларга рәхмәтле булган, чөнки алар өйләрдә уңайлык тудырганнар һәм халыкның тормышын җиңеләйткәннәр. Элек җәйнең матур айлары урманнан утын әзерләүгә киткән. Ә ул чорларда өйләргә газ бирүне бөтен авыл халкы шатлык белән бәйрәм иткән.

Яков Михайлович бүген дә әлеге оешмада зур җаваплылык белән эшли. Күрәсең, шуңа күрә дә ул хезмәт күрсәтә торган һәм районда иң зурлардан булган Казаклар Чаллысы авыл җирлегендә барлык таләпләр үтәлә.

Район газ хезмәте җитәкчесе Илнар Хәбибуллин да аны уңай яктан бәяли. Ә авыл җирлеге башлыгы Фәрит Хәсәншин, «ул яшәгән һәм эшләгән җирдә һәрчак тәртип. Галина Николаевна һәм Яков Михайловичлар - үрнәк гаиләләрнең берсе», ди. Аларның шәхси хуҗалыгында биш йөзгә якын эре мөгезле терлек. Бу – гаиләнең мул тормышын билгеләүче төп факторлар. Алар ике матур балалары өчен дә тыныч. Аларга яхшы тәрбия биргәннәр, югары белем алырга һәм тормышта үз урыннарын табарга ярдәм иткәннәр.

Фото: «Сельские горизонты»