Иван Егоров: «Илгә җиңү яулаган батырларны онытырга хакыбыз юк»

Бөек Җиңү бәйрәме белән!
Хөрмәтле карендәшләр, сугыш һәм тыл ветераннары! 

Бөек Ватан сугышында җиңүнең 80 еллык юбилее уңаеннан, барыгызны да чын күңелдән котлыйм.

1941 елның 22 июнендә немец-фашистлар Германиясе илебезгә явызларча басып керә. Барлык ир-егетләр Ватан азатлыгын сакларга күтәрелә. Алар, гомерләрен аямыйча, дошманга батырларча каршы торалар. Тылда хатын-кыз, бала-чага һәм картлар «Барысы да — фронт!» өчен дигән лозунг астында көнне-төнгә ялгап эшли. Фронттагыларның каһарманлыгы, тылдагыларның фидакарьлеге нәтиҗәсендә фашист Германиясе җиңелә. Ул көннәрдән соң, 80 ел узды.

Бүген без сугыш кырында һәлак булган солдатларны, туган җирләренә җиңү белән кайтып, тыныч тормышта арабыздан киткән элекке фронтовикларны олы хөрмәт белән искә алабыз. Җиңүнең 80 еллык юбилеен каршы алучы сугыш ветераннарына, тыл хезмәтчәннәренә хөрмәтебезне җиткерәбез. Хәзерге вакытта Ватаныбыз бөтенлеге өчен махсус операциядә хәрби бурыч үтәүче кыю ир-егетләр белән горурланабыз. 

9 Май көнне Бөек Ватан сугышында катнашканнар истәлегенә шәһәрләрдә һәм авылларда салынган һәйкәлләр янында парадлар уздырыла. Мәңгелек хәтер һәм хөрмәте билгесе буларак, һәйкәлләр итәгенә тере чәчәкләр салына. 

Илгә җиңү яулаган буын батырлыгын онытырга хакыбыз юк, ә аның өчен барыбыз да үз туган авылының, туган төбәгенең, туган иленең патриоты булырга тиеш. Балаларны һәм оныкларны да шул рухта тәрбияләргә тиешбез. Шул чагында гына илебез көчле булыр.

Сугыш ветераннары исән-сау булып, аларны Җиңүнең 85 еллык юбилеенда да котлый алсак иде. Илебез күге аяз булсын, дөньяда сугышлар тынып, тынычлык урнашсын. Тынычлык булса, бар да булыр — муллык та, байлык та, сәламәтлек тә.