Югары Багражда өмәләр гөрләде

Зәй районының Югары Баграж авылы халкы бердәм булып, авылны тәртипкә китерү өчен өмәгә чыкты. Язгы кояш җылыткан бу көннәрдә авылда эш кайный, халык бер-берсенә булышып, тирә-юньне чистарта, матурлый. Югары Баграж халкының бердәмлеге һәм тырышлыгы авылны тагын да ямьләндереп, яшәү өчен уңайлырак итә. Бу хакта безгә клуб җитәкчесе Гөлия Бутакова хәбәр итте:

«Бу арада авылда эш гөрләде генә. Зират өмәсе, һәйкәл янын төзекләндерү, тау өстендәге «Җиңүгә 80 ел» язуны яңарту кебек зур эшләр янына, чиркәү тирәсен чистарту эше дә өстәлде. Шунысы бик куандыра: авыл халкы бик бердәм һәм тырыш безнең. Элек- электән шулай булган. Авылның төп яшәүче халкы янында кунакка кайткан авылдашларның булуы да сөендерә. Һәр кешенең йөрәгенә якын, җанына газиз урын шул ул туган авыл».