Ирина Калмыкова: «Нәсел ныклыгы әби-бабайдан башлана»

Гаиләсе булмаган кешенең бәхете дә булмый диләр. Гаиләне мин бер зур көймә белән чагыштырыр идем. Андагы кешеләрнең берсе генә төшсә дә, көймә чайкала башлый. Ә тормыш ул — зур диңгез. Бу диңгездә көймә белән йөзәр өчен тырышлык, сабырлык кирәк. Кыскасы, гаилә туры барырга, бөтен авырлыкларны бергә-бергә җиңәргә тиеш. Минем әниемнең гаиләсе шундыйлардан дип саныйм.

Зур һәм тату нәселе әби-бабайдан башлана. Бабай –   Архип Михайлович Басаркин (1924 елгы). Ул Балык Бистәсе районының Керәшен Казысы авылыннан. Әби – Евдокия Васильевнадан (кыз фамилиясе Яковлева) (1921 елгы), Питрәч районының Керәшен Сәрдәсендә туып-үскән. Бөек Ватан сугышы тәмамлангач, Архип һәм Евдокия танышалар, соңрак өйләнешәләр. Керәшен Казысында яшиләр. Гаиләдә бер-бер артлы җиде бала туа: Алексей, Анна, Иван, Мария, Елена, Пётр, Николай. «1968 елда Әркип бабай сугыш яраларыннан вафат була. Әби җиде бала белән ялгыз кала. Авырлыкка карамыйча, балаларын аякка бастыра. Бөтенесе дә гаилә корып, төрле шәһәрләргә китеп яшиләр. Хәзерге көндә 17 оныгы һәм оныкларының 29 баласы үсә.