Яңа Мәлкән авылы халкы Ватаныбыз сакчыларына ярдәм кулы сузды

Минзәлә районының Яңа Мәлкән авылы мәдәният йорты, китапханә хезмәткәрләре, авылдашлары һәм читтә яшәүче якташлар бергәләп, махсус хәрби операциядә катнашучы ватандашларына бәйрәм күчтәнәчләре әзерләделәр.

Бу изге эшкә һәркем үз өлешен кертте: тәм-томнар, шәхси гигиена әйберләре, урын-җир кирәк-яраклары – барысы да җылылык һәм кайгыртучанлык белән тутырылган посылкаларга салынды.

«Бу посылкалар безнең сугышчыларыбызга туган якның җылысын, якыннарының кайгыртуын тоярга ярдәм итәр дип ышанабыз. Аларның һәрберсендә безнең йөрәк җылыбыз, рәхмәтебез һәм иң изге теләкләребез бар. Без барыбыз да бер теләктә: ил-көннәребезгә тынычлык урнашсын, барлык ир-егетләребез исән-сау әйләнеп кайтсыннар иде. Гаиләләрендә бәхет-шатлыкларга гына күмелеп яшәсеннәр, балаларының, оныкларының шат тавышларына куанып, тыныч тормышта яшәсеннәр иде», – ди мәлкәнлеләр.

Бу акция тагын бер кат безнең халыкның бердәмлеген, Ватаныбызга булган мәхәббәтен һәм авыр минутларда бер-беребезгә ярдәм итәргә әзер булуын күрсәтте.

С.Упаева фотолары.