«Һәр тасмада – өмет һәм теләк»: Ленино авылында маскировка челтәрләре үрү эше дәвам итә

Бу эшкә авылның битараф булмаган, йөрәкләре Ватан өчен тибүче кешеләре җәлеп ителгән. Аларның һәркайсы, үз өлешен кертеп, җиңүне якынайту өчен тырыша.

Челтәргә үрелгән һәр тасмага изге эш катнашучылары үз теләкләрен кушалар. Чөнки алар белә: бу челтәрләр кемнеңдер гомерен саклап калу, сугышчыларны дошманнан яшерү мөмкинлеге.  Егетләребезнең өйләренә исән-сау кайтулары өчен тырыша волонтерлар. Һәр тасмада – өмет, теләк һәм Ватанга булган чиксез мәхәббәт чагыла.

«Менә чираттагы маскировка челтәре дә әзер, аны авылдашларыбыз кечесеннән олысына кадәр бергәләп эшләделәр. Без хәрбиләребезне һәм техникабызны саклауга өлеш кертүебез, сыйфатлы һәм ышанычлы маскировка чаралары булдыруыбыз белән горурланабыз.

Бу эш төрле буыннарны берләштерә, тәҗрибә һәм белемнәрне бер-берсенә тапшыра.Сезнең ярдәмегез һәм хезмәтегез өчен рәхмәт, авылдашлар», – ди авыл җирлеге башлыгы Светлана Питеркина.

Фотолар: Е. Лаврова. Ленино авылы мәдәният йортыннан.