Бүген – Бөтендөнья китап яратучылар көне

Баланы лаеклы шәхес итеп үстерү өчен беренче ярдәмче — китап, дип әйтә иделәр. Әйе, иделәр. Чөнки бүгенге көндә мондый әйтемне белү түгел, әлеге бинага илтүче үлән баскан сукмакка басып та карамаучылар шактый.

Китапханәнең төп байлыгы китаплар булса, иң кадерлесе — андагы китапларны укырга яратучыларның күп булуы.

Бүген китап, газета укучылар бармы? Укучыларда китап укуга ничек кызыксыну уятырга? дигән сораулар белән Галина Ильничнага мөрәҗәгать иттек:

«Хәзерге заманда китап укымыйлар инде, димәгез. Укыйлар. «Кояш чыкса — табигать яңара, китап укысаң — күңел агара», диләр бит.

Әйтмим, яшьләрнең гаджетларын китапка алыштыруы авыррак, әмма бөтенләй үк өметсез түгел. Балалар арасында да бар китапханәнең кай тарафта урнашуын белүчеләр. Эшемне бик яратам. Китап укучылар юк дип тә зарлана алмыйм, кеше өзелеп тормый. Кызыксындыру өчен күренекле кешеләр белән очрашулар оештырырга, төрле бәйгеләр, бәйрәм-чаралар уздырырга тырышам», — диде ул.