Җәй турында шигырьләр

Җәйге уйлар️️
Чәчкә исе сеңгән, җиләк исе
Җәй агышын тоям күкрәгемдә.
Җәй тылсымлы алсу йөзләремдә
Кояш көлә зәңгәр күкләремдә.

Якты нурлар тула күзләремә,
Көмеш сулы зәңгәр чиләгемә.
Җылы яңгыр назларына сусап
Тулып пешкән бакчам җиләгенә.

Ясминнәрем ак чәчәге тәмен,
Шифаларын коя чәйләремә.
Серләремне сөйләп туя алмыйм
Кунак булып килгән җәйләремә.

Серем тыңлар булып нәзберек җил
Сөеп, сыйпап үтә йөзләремнән.
Җәйнең яме, назы, төсе сеңгән
Алсу нурлар тама күзләремнән.
Зинаида Захарова

Җәйге яңгыр
Җәйге яңгыр явып тора,
Килә теләк телисем.
Балачактагы шикелле
Яланаяк йөрисем.

Иң кирәкле челлә айда,
Яңгыр теләгән чакта,
Шифалы вак яңгыр ява,
Наз иңгән күк кочакка.

Сусаган үсемлекләргә
Яңгыр кирәк бу мәлдә
Табигатьнең мине аңлап
Тыңлавы микән әллә?...

Рәхмәт сиңа, әй Ходаем,
Теләгемне ишеттең -
Тилмереп көткән чагында
Яңгырың сибеп киттең.

Яшьнәвең дә куркыч түгел,
Усаллык та юк күкрәвеңдә.
Тәгәрәп ауныйсым килә
Җир-Анам күкрәгендә.
Татьяна Миронова

Ромашкалар
Йомшак җилләр таң нурлары белән
Ромашкалар үскән болынга
Чык таратты, ак таҗларга тезеп,
Ах, бу нинди нурлы могҗиза?

Җемелдәде болын, ак тәлгәшләр
Үз телендә көлде, җырлады.
Бормаланып киткән тап-тар сукмак
Рәшә агымында югалды.

Уйнады чык бәллүр тамчы булып,
Сибелеп, балкып акты тере нур.
Ромашкалар ак таҗларын какты,
Бар тирә-як якты һәм горур.

Монда чиста, әйтерсең җир үзе
Нурлы җанын ачып күрсәтә.
Ромашкалар, энҗе коя-коя,
Җирне данлап күкләргә дәшә.

Георгий Ибушев

Фото: Алина Кондратьева