Күз курка, кул эшли

Шул елның 24 июнендә Казан епархиясе протоиерее Павел Павлов, Субашка килеп, керәшенчә беренче тапкыр Божественная литургия үткәрде. Керәшен яшьләре активистлары Николай Трофимов һәм Руслан Максимовлар чиркәү төзелешен оештырып йөрүчеләр булдылар һәм бүгенге көнгә кадәр бу эшне җаваплы башкаралар. Бу төзелешкә Субаш халкы да, Субаштан чыккан кешеләр дә, якын-тирәдәге авыллар да үз өлешләрен кертте.

Стеналары өелеп бетте, түбә рубероид белән капланды, аның өстенә хәтта гөмбәз дә куелды. Инде түбәсен калай белән ябарга каян акча табарбыз, дип торганда, тагын бер игелекле кеше табылды. Субашта туып, хәзерге вакытта Казанда яшәүче Михаил Подъячевлар гаиләсе, түбә өчен җитәрлек профнастил кайтартып, эшчеләр табып, 3-4 сәгать эчендә чиркәүнең түбәсен ябып китте. Ир-атлар түбә япкан арада, хатыны Антонида Федоровна эшчеләрне ашату-эчертү якларын карады.

Шулай итеп, чиркәү төзелеше төгәлләнеп килә. Ходай биреп, озакламый, службалар да башланыр. Чиркәвебез әллә каян күренеп, авылыбызга ямь биреп тора. Төзелештә ярдәм күрсәткән һәр кешегә, шулар арасыннан аерып алып, Михаил Подъячевлар семьясына, зур рәхмәтебезне җиткерәбез.