Венера Аитовадан нарат күркәсе кайнатмасының ике төрле рецепты

1.Нарат күркәсеннән кайнатылмаган варенье өчен наратның яшел күркәсен яхшылап юарга, боҗралап турарга һәм 1/1 исәбе белән бал белән болгатырга.

Банкага бал белән күркәне чиратлаштырып та тутырырга була. Вареньены суыткычта сакларга, 2-3 көн болгаткалап торырга кирәк.

2.Яшел күркәләрне яхшылап юарга, бер сәгатькә суда калдырырга да мөмкин.

1 кг күркәгә 1,9 кг шикәр комы, 1 литр су кирәк булачак.

Суга шикәр комының яртысын салып ширбәт ясарга, аннары күркәләрне салырга һәм куерганчы 1-2 сәгать кайнатырга. Соңыннан калган шикәр комын салып болгатырга. Кайнатма суынгач банкаларга тутырырга.

Авырганда, аеруча балалар (аденоидлар белән интегүчеләр өчен дә шәп диләр!) өчен мунчадан соң файдалы һәм тәмле дә әле!