Кукмарада мәгариф учреждениеләренең яңа уку елына әзерлеге тикшерелде

Район башлыгы киңәшчесе Равия Каримуллина җитәкчелегендәге комиссия балалар бакчасы һәм мәктәпләрдә булып, җәй көне башкарылган ремонт эшләре, җиһазландырылу дәрәҗәсе, мәктәп яны участокларының торышы һәм башкалар белән танышты.

«Быел районда мәгариф учреждениеләренең яңа уку елына әзерлеген тикшерү максатыннан, 6 эшче төркем булдырылды. Алар үз эшләрен 14 августта башлап җибәрде. Ә 18 августка тикшерү эшләре төгәлләнергә тиеш. Шуннан соң махсус комиссия оешып, башкарылган эшкә нәтиҗә ясый. Анда бина, кабинетларның төзеклеге, бакча участокларының торышы һәм башкалар исәпкә алына», — дип аңлатты Равия Каримуллина.

Әлеге комиссия булган барлык мәгариф учреждениеләре дә яңа уку елына әзер: кабинетлар чиста, иганәчеләр, үзләренең, әти-әниләр ярдәме белән ремонт эшләре башкарылган, укучылар, укытучылар бергә-бергә бакчада яшелчә, җиләк-җимеш үстергәннәр. Районда республика, федераль программалар ярдәмендә дә мәгариф учреждениеләренә капиталь төзекләндерү өчен зур финанс мөмкинлекләр бирелә.

Фотода: Үрәсбаш балалар бакчасы.  Җитәкчесе Любовь Павлова.

Чыганак