Казанда Җиңү бәйрәмендә кайбер чикләүләр кертелә

Казандагы Җиңү парадында быел халык маска-битлектән булырга тиеш. Җиңү парады 9 май көнне Меңьеллык мәйданында иртәнге сәгать 10да башлана. Әмма парадны карау өчен, халыкка иртәнге 9.30 сәгатькә үк килеп, термометрия узарга кирәк булачак.

Татарстан Министрлар Кабинетындагы брифингта шәһәр башкарма комитетының мәдәният идарәсе начальнигы Азат Абзалов сөйләгәнчә, махсус контроль-пропуск пунктларында кулларны йогышсызландыру өчен санитайзерлар булачак, шулай ук, тән температурасын да үлчәячәкләр. Парадка килүче казанлылар шәхси саклык чараларына җитди карарга, шунлыктан урамда да маска-битлектән йөрергә тиеш булалар.