Эшче һөнәр ияләрен «Блогер.Татар» бәйгесендә катнашырга чакыралар

Татарстанда "Блогер.Татар" республикакүләм һөнәри блогерлар бәйгесе игълан ителә.

«Блогер.Татар»ның приз фонды 200 мең сум. Барлыгы ун җиңүче сайланачак, бишесе иҗади һәм бишесе эшче һөнәр ияләре. Ягъни Һәр җиңүчегә бүләккә 20 мең сум биреләчәк. «Матбугат.ру» порталының хуҗасы һәм бәйгене оештыручы Данил Сәфәров эшче һөнәр ияләрен курыкмыйча әлеге бәйгедә катнашырга чакырды.

Ул гаризалар 10 февральгә хәтле кабул ителсә дә, хәзер блог алып бара башлау соң түгел икәнен аңлатты. «Әгәр дә аның 100-200 язылучысы булып, ул блогын бик кызык алып бара һәм аның потенциалы зур икән, ул җиңәргә мөмкин», — диде бәйгенең оештыручысы.

Матбугат конференциясендә әйтелгәнчә, жюрида биш кеше булачак. Аккаунтларны аш-су блогеры Рафилә Шәмсетдинова, беренче татар блогеры Ринат Галиәхмәтов, блогер һәм журналист Гөлназ Сәфәрова, видеоблогер Фагыйлә Шакирова һәм тракторчы-блогер Василий Иванов бәяләячәк.