Лидия Аркадьевна 39 ел инде авыл китапханәсен җитәкли

Кечерәк кенә Керәшен Сәрдәсе авылында балалар да, өлкәннәр дә ашыга торган урын бар. Биредә китап исе килә, халык җырлары яңгырый, ә киштәләрдә классика белән янәшә җирле осталарның эшләре тора. Болар барысы да – авыл китапханәчесе Лидия Аркадьевнаның 39 ел мәхәббәт һәм тугрылык белән башкарган тырыш хезмәте. Аның бу һөнәргә бару юлы балачактагы китап укуга булган мәхәббәттән башлана.

– Мин китапларны балачактан ук бик ярата идем, –  дип искә ала Лидия Аркадьевна. Бу синең дөньяң, син башың белән аңа чумасың. Яшь чагымда классика укыдым, ә хәзер чын күңелдән татар әдәбиятын – бигрәк тә хәзерге язучыларның әсәрләрен сайлыйм.

Китапханәче булганчы, Ул Питрәчтә тегү цехында технолог булып эшләргә өлгергән. Әмма китапларга тартылу көчәя һәм ул мәдәният училищесына укырга керә. Шулай итеп, 1986 елда китапханә эшендә аның зур тарихы башлана. Лидия Яковлева өчен китапханә – китаплар саклану урыны гына түгел, ә мәдәният һәм иҗат үзәге.

Питрәч районының үзәк китапханәсе директоры урынбасары Сиринә Кәбирова:

- Лидия Аркадьевна-үз эшенең югары квалификацияле белгече. Даими рәвештә эшнең яңа формаларын кертә. Китапханәдә әдәби-музыкаль кичәләр, викториналар, диспутлар, китап премьералары, республикабыз язучылары һәм шагыйрьләре белән очрашулар үткәрелә.

Кул эшләре белән мавыгу шулай ук китапханәче эшендә кирәк була.

– Бездә «Йомгагым» клубы бар, анда кул эшләре сөючеләр җыела, – дип сөйли Лидия Яковлева. - Без чигәбез, бәйлибез, халык орнаментларын өйрәнәбез. Ә күптән түгел этностудия булдыру өчен грант оттык – хәзер традицион керәшен костюмнары тегәбез.

Аның эшендә иң мөһиме – һәр укучыга якын килә белү. Балалар бирегә «балалар Сабантуена» һәм квестларга, яшүсмерләр Батырлык дәресләренә, өлкән буын фольклор кичәләренә килә. Хәтта сәламәтлек мөмкинлекләре чикләнгән кешеләр дә монда җылылык һәм кайгыртучанлык тоя. Дүрт дистә елга якын эш дәверендә Лидия Яковлева китапханәнең ничек үзгәрүен күргән

– 90 нчы елларда авыр булды-китаплар бөтенләй килмәде диярлек, - дип искә ала ул. - Ә хәзер бездә бик яхшы фонд, электрон каталог, социаль челтәрләрдә бит бар. Әмма иң мөһиме-кешеләр элеккечә укырга ярата.

Аның хезмәте игътибарсыз калмый: ул күп санлы мактау грамоталары һәм Рәхмәт хатлары, шулай ук ТР Мәдәният министрлыгының «мәдәният өлкәсендәге казанышлары өчен»күкрәк билгесе белән билгеләнгән. Лидия Аркадьевна китапханәче генә түгел, «Чулпы» керәшен җыр ансамбле солисты, чәчәк үстерүче һәм җәмәгать эшлеклесе дә. Үз авылы өчен  җан атучы.

Народный вокальный ансамбль кряшен «САЯР»