Керәшен Сәрдәсендә керәшен бизәкләре турында сөйләштеләр

«Кич атна кичләре» матур традициягә әйләнгән очрашу. Мондый очрашуларның нәкъ менә авыл мәдәният йортларында узуы — керәшеннәрнең йола-гадәтләренә булган зур хөрмәт билгесе. 

«Җәйнең җылы, истә калырлык кичендә җыелучылар бик мөһим һәм кызыклы теманы кузгаттылар. Сүз керәшеннәрнең милли киемнәрендәге борынгы бизәкләрне һәм үзенчәлекле атрибутларны саклап калу, аларны бүгенге көнгә яраклаштырып яңарту турында барды.

Очрашу барышында катнашучылар үзләренең гаилә архивларындагы истәлекләр белән уртаклаштылар, әби-бабалардан калган чигү үрнәкләрен карадылар. «Борынгы бизәкләр — ул безнең тарихыбыз, аларны онытмаска, киләчәк буынга җиткерергә кирәк», — дигән фикер һәркемнең күңелендә яңгырады», — диде мәдәният йорты җитәкчесе Айдар Маннапов.