Керәшен культурасын танытучы артистларны бүләкләделәр

Бүләкләү тантанасында Татарстан Республикасы Премьер-министры урынбасары Ләйлә Фазлыева һәм Татарстан Республикасы мәдәният министры Ирада Әюпова катнашты.

Ирада Әюпова артистларның уникальлеген һәм тамашачыга күренми торган хезмәтен ассызыклады:

«Артист сәхнәгә чыкканда, аның ялгышырга хакы юк, чөнки аның каршында зал. Сез сәхнәгә чыкканда, төрле хисләрне һәм чорларны трансляциялисез, һәр көнне башыгызда гаять зур күләмдә мәгълүмат йөртәсез. Сез барыгыз да талантлы...».

Бүләкләнүчеләр арасында керәшеннәрнең «Бәрмәнчек» дәүләт фольклор ансамбле солистлары да бар иде. Илнар Зәйнетдиновка (вокалист) һәм Алмаз Тукмановка (балет артисты) Татарстанның атказанган исеме бирелде. Ә Татарстанның атказанган артисты Елена Григорьева-Даниловага күпьеллык нәтиҗәле хезмәте һәм музыка сәнгатен үстерүгә керткән өлеше өчен Татарстан Рәисенең рәхмәт хатын тапшырдылар.

Кәрим Тинчурин исемендәге Татар дәүләт драма һәм комедия артисты Артем Пискунов узган ел Татарстанның атказанган артистына лаек булган иде. Аңа  әлеге чарада тантаналы рәвештә бу бүләкне тапшырдылар.

Фото: Артем Пискунов,

Татарстан Республикасы Мәдәният министрлыгы.