Яңа Балыклының «Туганайлар» ансамбле «Җырлыйк әле» фестиваль-конкурсында катнашты

«Җырлыйк әле» фестивале фольклор ансамбльләрен һәм башкаручыларны берләштерә. Катнашучылар үзләренең иң яхшы чыгышларын тәкъдим итәләр, халык җырларын, биюләрен һәм инструменталь әсәрләрне башкаралар. Бу чара мәдәни алмашуга һәм халыклар арасындагы дуслыкны ныгытуга ярдәм итә.

Бакалының Яңа Балыклы авылы мәдәният йортының «Туганайлар» керәшен фольклор ансамбле дә Туймазы районының «Бабай утары» дип аталган матур  урында узган «Җырлыйк әле» фестиваль-конкурсында чыгыш ясады.

«Безнең коллектив бу юлы конкурска хөрмәтле кунак буларак чакырылды. Кызганычка, төрле сәбәпләр аркасында, барлык артистларыбыз да бара алмады, әмма киләсе елда тулы состав белән барып, конкурста катнашырга өметләнәбез.

 

Бу көнне безнең төп бурычыбыз — тамашачыларга керәшен халкының бай мәдәни мирасын һәм үзенчәлеген күрсәтү иде. Ансамбль артистлары төбәгебез йола-гадәтләренең мөһим өлеше булган милли киемнәребезне тәкъдим иттеләр. Тамашачылар безнең чыгышны зур кызыксыну белән карадылар», – диде Яңа Балыклының мәдәният йорты методисты Наталья Васильева.

Наталья Васильева фотосы.