Якты Күл мәдәният йортында «Гаилә һөнәрләре» күргәзмәсе оештырдылар

Якты Күл авылында узган «Гаилә һөнәрләре» күргәзмәсе иҗатка гашыйк кешеләрне берләштерү өчен искиткеч мәйданчыкка әйләнде. Бу чараның төп максаты — гаиләдә һәркемнең үз сәләтен ничек ача алуын һәм яраткан шөгыльләрнең уртак мавыгуга әверелеп, яңа үрләр яуларга этәргеч бирүен күрсәтү иде.

Күргәзмәгә килүчеләр чын мәгънәсендә иҗат дөньясына чумдылар. Биредә милли киемнәрдәге курчаклардан алып, оста куллар белән ясалган агач савыт-сабаларга кадәр — һәр әйбер үзенең кабатланмаслыгы белән сокландырды. Бу экспонатлар — гади бизәкләр генә түгел, ә гаилә тарихының, буыннардан-буыннарга күчкән гореф-гадәтләрнең җанлы чагылышы.

Очрашуның иң истәлекле мизгеле булып курчак ясау буенча үткәрелгән мастер-класс торды. Кечесе дә, олысы да бердәм булып, үз куллары белән саклагыч (оберег) ясарга керештеләр. 

«Бу чара безгә гаилә кыйммәтләренең ни дәрәҗәдә кадерле булуын һәм буыннар арасындагы бәйләнешне саклауның мөһимлеген тагын бер кат искә төшерде. Күргәзмәгә килеп, үзләренең иҗади энергиясе белән бүлешкән һәр кешегә зур рәхмәт! Киләчәктә дә шундый матур очрашулар күп булсын», – ди мәдәният йорты җитәкчесе Татьяна Егорова.

Татьяна Егорова фотолары.