Һәр якның үз таланты: Авылларда үзешчәннәр концерт, театр күрсәтә

Һәр авылның үз таланты бар, һәм бу талантлар еш кына мәдәният йортларында оештырылган концертларда, театр тамашаларында балкый.

Менделеевскиның Гассар исемендәге мәдәният йортында эшләп килүче «Туганайлар» ансамбле, үзләренең керәшенчә әзерләгән концертын Алабуганың Олы Шүрнәк авылында тәкъдим итте. Тамашачылар артистларның һәр чыгышын көчле алкышлар белән каршы алды. Яна Шалаумова башкарган җырулар аеруча ямь өстәде, ә ансамбль җитәкчесе Инна Килеева башкаруындагы җырулар беркемне дә битараф калдырмады. Клуб җитәкчесе Роза Роева "Туганайлар"га бик җылы, матур концерт өчен рәхмәтләрен белдерде. Бу концерт авыл халкының күңеленә хуш килде, аларның рухын күтәрде.

14 март көнне Питрәч районының Керәшен Сәрдәсе авылында да зур бәйрәм булды. Авылның «Сәрдәлеләр» театр төркеме үз мәдәният йортында Т.Миңнуллин әсәре буенча куелган "Гөргери кияүләре" спектаклен уйнадылар. Зал тутырып килгән тамашачы чын күңелдән сөенеп, рәхәтләнеп ял итте. Авыл үзешчәннәренең осталыгы, аларның сәхнәдәге табигыйлеге тамашачыларны сокландырды.

Бу мисаллар авылларда мәдәни тормышның ничек кайнап торуын, талантлы кешеләрнең үз сәләтләрен халыкка күрсәтү өчен нинди мөмкинлекләр табуын ачык күрсәтә. Авылларның үз талантлары – ул безнең мәдәниятебезнең, йола-гадәтләребезнең саклануына һәм үсешенә зур өлеш кертүче кыйммәтле хәзинә. Аларның чыгышлары авыл халкына шатлык, рухи азык бирә, бердәмлекне ныгыта.

Фотолар: А. Маннапов, Р. Роева.