Алма, мәк һәм кокос конфетлары ясау ысуллары

Алма конфеты
Алма конфеты өчен түбәндәгеләр кирәк: җитен орлыгы — 100 грамм, киптерелгән алма — 100 грамм, бал, корица — тәменчә. Конфет өстенә сибәргә уылган кокос.

Кофе тарттыргычта башта — җитен орлыкларын, аннары алманы ваклыйбыз. Шуңа бал һәм корица салып болгатабыз. Кулга целлофан перчатка киеп, бу катнашмадан түгәрәк конфетлар ясыйбыз һәм кокос вагында әвәлибез. 

Мәкле конфет
Мәкле кофет өчен кирәк: мәк — 1 стакан, йөзем — 1 стакан, бөтнек яфрагы, бер апельсин кабыгының вак кыргыч аша чыгарылган сары өлеше.

Кофе тарттыргычта башта — мәкне, аннан йөземне ваклыйбыз. Бөтнек яфракларын ботка хәленә килгәнче ваклыйбыз. Барысын бергә кушып болгатабыз һәм бәләкәйрәк түгәрәк шарлар ясыйбыз. Апельсин кабыгында әвәлибез. Суыткычка куеп торабыз.

Кокослы конфет
Кокослы кофет өчен кирәк: миндаль чикләвеге — 1 стакан, кокос вагы — 1 стакан, кокос мае — 1 аш калагы, бал — тәменчә.

Миндальне кофе тарттыргычта яки блендерда он хәленә килгәнче ваклыйбыз. Кокос вагы, кокос мае (анысы булмаса да ярый) һәм бал кушып, кул белән яхшылап изәбез һәм түгәрәкләп әвәлибез дә суыткычка куябыз.