Яңа Усыда «Карга боткасы» бәйрәме үтте

“Карга боткасы” – элгәредән килә торган бәйрәмнәренең берсе. Ул – язны, җәйне каршы алу, табигатьне олылау, саф һавада күңел ачу һәм тагын бик күп максатларны берләштерә. Шуңа күрә, кара каргалар килгәч, халык бәйрәм оештыра. Бәйрәмнең төп сые, әлбәттә «карга боткасы». Мөслим районының Яңа Усы авылында да карга боткасы пешерделәр. Олысы да, кечесе дә тәмле ботка, күкәй ашарга табигатькә чыкты.

“Елдагычадан аермалы буларак, быел «Карга боткасы» бәйрәме үзенчәлеклерәк узды. «Гаилә елы» кысаларында бәйрәмгә һәркем үз гаиләсе белән килде.  Гаилә эстафеталары, җитезлектә, тапкырлыкта ярышлар уздырылды. Җырулар җырлап, биеп күңел ачтылар. Бәйрәм  учак ягып, казанда пешкән тәмле ботканы ашау белән тәмамланды”,– дип хәбәр иттеләр Яңа Усы мәдәният хезмәткәрләре.

 

 

Фотолар мәдәният йортыннан.