81 яшьлек Мария Филиппова мобилизацияләнгән егетләр өчен бияләйләр бәйли

81 яшьлек Мария Филиппова күпләрнең хәрби хезмәткәрләргә оекбашлар бәйләгәнен ишеткән һәм игелекле эшкә кушылырга карар иткән. Әмма оекбашлар түгел, ә бияләйләр бәйләргә булган.

- Мин армиядә хезмәт итүче әнисе булуның ничек икәнен беләм. Заманында дүрт улымны армиягә озаттым һәм көттем. Мондый игелекле эштән читтә кала алмадым, егетләргә ничек тә булса ярдәм итәргә теләдем. Бу бияләйләр  аларның кулларын җылытсын иде, – ди Мария Семеновна.

Тумышы белән ул Балык Бистәсе районы Алан-Полян авылыннан. Бөек Ватан сугышы вакытында туган, сугыштан соңгы авыр елларны кичергән, 38 яшендә тол калган һәм 5 бала тәрбияләп үстергән.

Кышын Мария Семеновна Питрәчтәге кызы Аннада кунак була. Хәзер өченче пар бияләйләр бәйли. Ватанны саклаучылар көнне гуманитар ярдәм җибәрүгә кадәр бәйләвен дәвам итәчәк.

Люция СИРАҖИЕВА, Алга