Түбән Кама керәшеннәре грант отты

Россия Президентының мәдәни инициативалар фонды гранты исәбенә Түбән Кама районы керәшеннәре оешмасының шушы елның октябрь аеннан башлап 2023 елның сентябрендә башкарасы эшләре халык өчен бик кирәкле.

Бер ел дәвамында шәһәрдәге Халыклар дуслыгы йорты керәшен культурасын кабат җанландыру, саклау һәм халыкка таныту максатын тормышка ашыра торган иҗат мәйданына әйләнәчәк.

Җирле керәшен оешмасының шәһәр янәшәсендә урнашкан Красный Ключ поселогындагы “Сказка” балалар бакчасы белән берлектә эшләнгән “Ата-бабалар мирасы” проектын тормышка ашыруда, шулай ук, 31нче мәктәп, “Сүрәкә” һәм “Баш Чишмә” керәшен фольклор аснамбльләре ярдәм итәчәк.

“Максатыбыз – керәшен халкының онытылган йолаларын, традицияләрен өйрәнеп, өр-яңадан халыкның үзенә кайтару, керәшен культурасы бәйрәмнәрен популярлаштыру. Аның өчен, керәшен фольклор коллективларын, волонтерларны, мәктәп укучыларын, бакчага йөрүче балаларны һәм педагогларны, тәрбиячеләрне дә җәлеп итеп, шушы иҗат мәйданында төрле кичәләр, очрашулар, бәйрәмнәр оештыру”, – дип сөйләде Түбән Кама районының керәшен мәдәни-этнографик җәмгыяте председателе урынбасары Эльмира Гыйльметдинова.