Кызыл күкәйләр – олы бәйрәм билгесе

Борынгыдан килгән йолаларыбыз инде онытыла, юкка чыга бара дип әйтсәк тә, әле халкыбызның хәтерендә, өлкән буын кешеләрнең телендә бик күп истәлекләр, тел һәм рухи байлыгыбыз саклана. 

Бакчабызда, керәшен халкының йола-гадәтләрен, уеннарын чагылдырган «Олы көн» исемле бәйрәм иртәсен үткәрдек. Өстәл түрендә чыжлап, самавыр кунакларны үз янына җыйды. Бәйрәмгә килгән кунаклар «Сүрәкә» керәшен халык ансамбльнең җырчысы Галина Самойлова, җырчы керәшен кызыбыз Валерия Михайловалар дәртле керәшен җырларын җырлап барысын да биеттеләр. Апуш балалар китапханәсеннән килгән Ирина Дмитриевна йомыркалар бизәп, ә лаеклы ялдагы хезмәттәшебез Гөлнур Харисовна мунчалалардан курчаклар ясарга өйрәтеп мастер класслар күрсәтеп, курчакларны өстәлдә биетеп, барысын да шаккаттырдылар. Ә инде нәни чебиләрнең биюе нур өстенә нур өстәде. Үзләре дә буш кул белән килмәделәр, бер кәрзин күкәй калдырып та киттеләр. Бәйрәм иртәбез «Күкәй тәгәрәтү», «Төсле тасмалар», «Күкәйне иптәшеңә бир», «Төсле кулчатыр» түгәрәк уеннары белән үрелеп барды. 

Кунаклар һәм балалар өчен «Без бердәм! Без бүленмәс!» дип исемләнгән ктаплардан күргәзмә оештырдык.  Әлеге бәйрәм чарасы, балаларга керәшен халкының мәдәнияте һәм тарихы турында белемнәрен яңартырга, йола-гадәтләребезне саклап калырга, милли үзаң тәрбияләргә этәргеч булды дп әйтәсе килә.

ү

Рузилә Фәйзетдинова фотолары.