Туй җырулары

Алъяпкычларым ал түгел,
Мин сөямен сезне — хәл түгел.
Мин сөямен сезне — хәлләр түгел,
Җаным ярып бирсәм — жәл түгел.

Бодайлар да чәчтем уңсын дип,
Буразналары тулсын дип.
Без бер ходайлардан бик телибез
Бик бәхетле парлар булсын дип.

Тубылгыда агач озын булмас,
Тубылгылар аша юл булмас.
Яхшы ата-аналарның балалары
Кайда гына йөрсә хур булмас.

Бәлеш ачтырганда җырланганы:
Ай-хай, бәлешләрнең и кайнары,
Тышларына чыккан майлары.
Җырлау кирәк, сыйлау кирәк
Килгән кунакларның байлары.

Безнең авылның магазинын
Сатучысы килми ачмыйлар.
Өстәлләргә килгән бәлешләрнең
Үбешмичә өстен ачмыйлар.
Магазинның сатучысы ай, килде инде,
Үбешкәчтен, бәлешләргә тәм керде инде.

Ит чыгарганда җырлана:
Биеккәй дә тауларның башларында
Ак каеннар кисеп турадым.
Ашагыз да, туганнар, и-калҗасын,
Кулларымны юып ла турадым.

Мәҗлес ахырында тау итү (рәхмәт) җырлары:
И ашыңа, туганаем, и ашыңа,
Дәүләт яусын синең башыңа.
Бүдәнәләр кебек юргалашып,
Бәхетләрең килсен каршыңа.

Саубуллашу җыры:
Ишек алларыңны себереп куй,
Алма тәгәрәтеп уйнарсыз.
Бу җырларымны тот исеңдә,
Безне сагынганда җырларсыз.