Луиза Янсуар: «Теләкләрең була күрсен кабул»

Язам сиңа

Пишу тебе, что я лечу домой (Сплин).

Язам сиңа яңгырлардан – төнге.

Кояш иркәләгән иртәләрдән.

Кочып алган чакта ят бер шәһәр

Кинәт, якын итеп, җилкәләрдән.

Парклардан, урамнардан язам,

Храмнардан – келпеп торган шәмнәр.

Синең йөрәк

Әйтмәсәм дә...

Юкса...

Белеп тибә:

Ничек миндә хәлләр.

- Ашыкма, – ди. –

Ашыгырга иртә!

Ашыгырга...

Иртә безгә...

Сабыр!

Язам сиңа – төнге отельләрдән:

«Теләкләрең... була күрсен... кабул...»

Вокзаллардан, таксилардан язам.

Самолеттан –

Калдырганда җирне.

Мин югында...

Ялгыш кына...

Ялгы-ы-ыш...

Урларлар күк

Дөньясыннан –

Сине.

Чыгармын күк,

Бутап,

Ят ишектән...

Секундларны

Саный-саный язам...

Хәбәреңнән җиңел сулар өчен:

– Җирдә һаман.

Адресым да – Казан.

6-11 сентябрь 2017

Казан-Мәскәү