Зәйдән карендәшләребез хәрбиләргә чираттагы гуманитар ярдәм илтте

Гуманитар ярдәм илтүчеләр барлыгы 5 меңгә якын километр юл үтеп, Донецк, Запорожье, Херсон өлкәләрендә булган.

Әлеге «УАЗ» машинасы махсус хәрби операция башында ук Зәйдән хәрбиләргә җибәрелгән иде. Ул берничә ел хезмәт итеп, шактый таушалган булган. Аны Зәйгә алып кайтып, ремонтлап, Зәй хәрбиләренә яңадан илтелде. Шулай ук хәрбиләргә радиомостлар, принтер өчен кирәкле әйберләр, домкрат, генераторлар һәм башка кирәк әйберләр алып барылды. Татьяна Миронова җитәкчелегендәге волонтерлар тиз пешә торган ашлар, боткалар җибәрделәр. 

Гуманитар йөкне җыюда төп ярдәмне эшмәкәрләр Владимир Долгов, Александр Чапков, Магомед Алиев, Николай Токранов, Наилә Әгъзамова, Владимир Уразайкин, Изге Макарий чиркәвенә йөрүчеләр күрсәткән. 

«Якташ хәрби ир-егетләрнең ныклыгы, ил иминлеге өчен көрәшүдә көчле булулары тагын да игелекле эшләр башкарырга көч, дәрт бирә. Егетләрнең без алып килгән ярдәмгә ничек сөенгәннәрен күрсәгез иде. Күп сөйләшмиләр алар. Җиңеп кайтырбыз, Алла бирса, диләр. Гуманитар ярдәм җыюга өлеш керткән һәр кешегә, бу эшне оештыручыларга рәхмәтләр, сәламнәр әйттеләр», — ди гуманитар ярдәм илтә баручылар.

Зәй офыклары