«Туганайлар»ны Бакалыда да укыйлар

Безнең редакция хезмәткәрләре Башкортстанда яшәүче Бакалы районы керәшеннәре белән тыгыз элемтәдә торалар. Алар турында күп кенә язмалар әзерләнде. Анда яшәүче туганыйларыбызның йола-гадәтләре, күренекле кешеләренең тормыш юллары яктыртыла.

Ирина Маркованың сүзләренчә, Үмер авылында «Туганайлар»ны авыл клубында халык белән бергәләп тә укыйлар. Бакалыдан газетага язылучылар да бар икән. Бу, әлбәттә, бик сөенечле күренеш.

«Газетада басылган язмалар, бигрәк тә тарихи һәм мәдәни темаларга багышланганнары, яшь буынны үз тамырларына, йола-гадәтләренә бәйләү өчен дә бик мөһим. Үземнең дә балаларым «Туганайлар»ны беләләр, һәр саны белән кызыксынып баралар», – дип әйтә Ирина Маркова.