Назаровкада, «Могҗизалар очраша» программасы төзеп, халык уеннарын өйрәнгәннәр

Җәй – балачакның иң матур мизгеле. Кояшлы көннәр шаян балаларның йөгереп-сикереп, рәхәтләнеп уйнавы өчен әйтеп бетергесез мөмкинлекләр ача. Хәрәкәтле уеннар аеруча да кадерле, чөнки алар балаларны шатлыкка күмә, күңелләренә яңа хисләр өсти.

Күптән түгел генә Назаровка авылында нәниләр өчен зур бәйрәм узды. "Чудеса встречаются - Могҗизалар очраша" дип исемләнгән уен программасы балаларны әкият дөньясына алып кереп китте. Клуб җитәкчесе Надежда Афанасьева сүзләренә караганда, чара бик күңелле һәм мавыктыргыч булган. Төрле конкурслар, башваткычлар һәм уеннар беркемне дә битараф калдырмаган. Онытылып барган халык уеннары, мәсәлән, "Түгәрәк уен" һәм "Яулык алыш" өйрәтелгән. Бәйрәмдә катнашучыларның барысы да бик актив һәм шат күңелле булган, ә чара аларга онытылмаслык тәэсирләр һәм яхшы кәеф бүләк иткән.

«Бәйрәмнән соң балаларның күзләрендәге очкыннар, йөзләрендәге елмаюлар озак вакыт сүнмәде. Алар әле дә булса уйналган уеннарны, көлкеле хәлләрне искә төшереп, бер-берсенә сөйлиләр, киләсе шундый ук чараны көтеп алалар. Әти-әниләр дә канәгать калдылар, чөнки балаларының күңелле ял итүе, яңа дуслар табуы, милли уеннарны искә төшерүе – зур бәхет. Мондый чаралар балаларның гына түгел, ә өлкәннәрнең дә күңелен күтәрә, көнкүреш мәшәкатьләреннән арынырга, балачак дөньясына кайтырга ярдәм итә», – ди Надежда Афанасьева.

Назаровка авылы клубы җитәкчелеге алга таба да  кызыклы һәм файдалы чаралар үткәрергә, балаларның җәйге ялын күңелле һәм истә калырлык итәргә планлаштыра. Чөнки балалар – безнең киләчәгебез, аларның шатлыклы балачагы – илебезнең иртәге. Һәр баланың күңелендә җәйге бәйрәмнәрнең якты хатирәләре саклансын!