Марафончы Евдокия Толстоводан эремчек пирогы рецепты

Мин бүген гаиләмне эремчек пирогы белән сыйлыйм әле. Авызда эри торган булып чыга бу пирог. Пешереп карагыз әле.
Камыр өчен кирәк: 200 гр ак май (сливочное масло), 100 гр шикәр комы,1 күкәй, бераз гына тоз, 1 чәй калагы камыр көпшәкләндергеч (разрыхлитель) яки 0,5 чәй калагы сода, 250 гр он

Эчлек өчен кирәк: 350 гр чамасы кибет каймагы (сметана), 200 гр эремчек, 150 гр шикәр комы, 4-5 күкәй, 2мандарин яки мармелад.

Эш барышы: йомшак май белән шикәр комын уабыз. Шуңа он, тоз, камыр көпшәкләндергеч кушып, валчык хәленә килгән камыр ясыйбыз. Ахырдан 1 күкәй кушып, камыр басабыз. Камырны 30 минут суыткычка куеп торабыз. Таба төбен майлап, кул белән генә камырны җәябез. Барлык ингредиентларны кушып болгаткан эчлекне камыр өстенә җәябез. Мандарин яки мармелад белән бизәк ясыйбыз. Камырның кырыйларын узорлап тигезләп чыгабыз, һәм 10 минуттан духовкага куябыз.

Ашларыгыз тәмле булсын. Милли ашларыбыз табыныбыз түрендә бергә булсын!