Лиана Самойлова «Дөнья энҗеләре»ндә Россия данын яклаячак

Алина КОНДРАТЬЕВА, 2 июнь 2026 - 13:28

302

Я.Емельянов исемендәге мәдәни үзәк хезмәткәре, Тукай районының Мәләкәс авылы кызы Лиана Самойлова – халыкара «Дөнья энҗеләре» матурлык конкурсы финалисты.

Лиана Самойлова «Дөнья энҗеләре»ндә Россия данын яклаячак

«Дөнья энҗеләре» — төрле илләрдән килеп, Казанда белем алучы студентлар арасындагы чибәрлек һәм талант конкурсы. Конкурс Казан балалар һәм яшьләр эшләре комитеты, шәһәрнең чит ил студентлары һәм аспирантлары ассоциациясе, Татарстан халыкларының яшьләр ассамблеясе тарафыннан оештырыла. Анда Казанның югары уку йортларында укучы студентлар катнаша.

Сайлап алу турларыннан соң, студентларның 15кә якыны финалга узды. Алар арасында керәшен кызы Лиана Самойлова да бар. 9 июнь көнне Казанның Ленино мәдәният йортында конкурсның финалы узачак. Финалда кызларны 4 сынау көтә: визитка (экранда видеоформатта таныштыру); милли костюмнардан дефиле; интеллектуаль тур; иҗат номеры.

Бу конкурста керәшен культурасын күрсәтүче Лиана Россия данын яклаячак. Лиана — иң актив керәшен яшьләренең берсе. Ул Казан дәүләт федераль университетында, магистратурада укый, «Бәрәкәт» керәшен яшьләр бүлеге җитәкчесе урынбасары.