Лиана Самойлова – «Дөнья энҗеләре» конкурсы финалисты

«Дөнья энҗеләре» — төрле илләрдән килеп, Казанда белем алучы студентлар арасындагы чибәрлек һәм талант конкурсы. Конкурс Казан балалар һәм яшьләр эшләре комитеты, шәһәрнең чит ил студентлары һәм аспирантлары ассоциациясе, Татарстан халыкларының яшьләр ассамблеясе тарафыннан оештырыла. Анда Казанның югары уку йортларында укучы студентлар катнаша ала. 

Быел конкурска студентлардан (Болгария, Ангола, Бруней-Даруссалам, Конго, Камерун, Эквадор, Иран, Һиндстан, Нигерия һәм башкалар) барлыгы 50дән артык гариза килгән. Сайлап алу этабыннан соң, 16 кыз финалга узды. Алар һәркайсы үз иленең мәдәниятен күрсәтте. Ә Россияне безнең Лиана тәкъдим итәчәк. Лиана — иң актив керәшен яшьләренең берсе. Ул Казан дәүләт федераль университетында, магистратурада укый. 

— Конкурста катнашу уем күптән бар иде. Быел соңгы курста укыйм. Шуңа күрә читтә калмаска булдым. 19 апрельдәге сайлап алу турында үзебез белән таныштырдык, иҗади чыгыш күрсәттек. Мин гөсләдә уйнап, 2021 елда экспедициядә язып алынган керәшен җыруын башкардым, — дип сөйләде Лиана.

Фото Лиана Самойлованың шәхси архивыннан