Кайбычтан Никита Русов яшь уйлап табучыларның төбәкара олимпиадасы призеры булды

Зур Кайбыч урта мәктәбенең 11нче класс укучысы Никита Русов «Мин табиб булачакмын» дип исемләнгән яшь уйлап табучыларның төбәкара олимпиадасы призеры булды.

Олимпиаданың финалы Казан дәүләт медицина университетында узды. Анда егермегә якын конкурсант катнашты, аларның һәрберсе медицина һәм биотехнологияләр өлкәсендә уникаль проект тәкъдим итте. Ел саен үткәрелә торган олимпиадада 8-11 класс укучылары, шулай ук медицина колледжлары һәм училищелары студентлары катнаша. Конкурс эшләре өч номинациядә каралды: «Медицина инструментлары», «Медицинада цифрлы технологияләр» һәм «Социаль инновацияләр».

Никита үз проектын «Медицинада цифрлы технологияләр» номинациясендә тәкъдим итте. Ул сәламәтлекне шәхси мониторинглауның имплантацияләнә торган системасын уңышлы яклады:

— Минем тарафтан эшләнгән система пациент организмының тормыш өчен мөһим күрсәткечләрен өзлексез күзәтеп торучы имплантацияләнә торган биодатчиктан гыйбарәт, — дип сөйләде Никита Русов. — Җайланма мәгълүматларны табибка яки медицина учреждениесенә реаль вакыт режимында тапшыра, бу авыруларны вакытында ачыкларга һәм пациентларның хәлен контрольдә тотарга мөмкинлек бирә. Мондый технология профилактик медицинаны үстерү һәм медицина ярдәменең сыйфатын күтәрү өчен зур потенциалга ия. 

Никита икенче дәрәҗә диплом белән бүләкләнде, ә район мәгариф бүлеге методисты Марина Русова төбәкара олимпиада финалистын әзерләгән өчен Рәхмәт хатына лаек булды.

Олимпиада медицина университетының «Иң яхшы абитуриентлар» белем бирү проектының бер өлеше булып тора. Интеллектуаль ярыш авыруларны дәвалау һәм профилактикалауга инновацион алымнарны үстерүгә, шулай ук сәламәтлекне саклауга ярдәм итүче заманча медицина технологияләре, приборлар һәм җайланмалар булдыруга юнәлдерелгән.

Чараны оештыручылар булып Татарстан Республикасы Сәламәтлек саклау министрлыгы һәм Казан медицина университеты чыгыш ясады. Киләчәк табиблар олимпиадасы «Яшьләр һәм балалар» милли проекты кысаларында үткәрелә, ул талантлы яшь тикшеренүчеләргә ярдәм итүгә һәм мәктәп укучылары арасында фәнне популярлаштыруга юнәлдерелгән. Милли проектны гамәлгә ашыру яшьләрнең потенциалын ачу һәм булачак табибларны һәм галимнәрне әзерләү өчен шартлар тудыра, ә мондый конкурслар мәктәп укучыларына үзләрен күрсәтергә һәм ватан медицинасын үстерүгә өлеш кертергә мөмкинлек бирә.

Фотолар: Марина Русова.