Кайбыч ягынан марафончы Ольга Шупшина керәшенчә аш-су турында язды

Керәшеннәр –  кунакчыл һәм ачык күңелле халык. Алар өчен кунакка йөрү һәм кунакларны каршы алу –  зур бер традиция, йола. Керәшен йортларында һәрвакыт кунакны шатланып каршы алалар. Кунак килгәндә, өстәлгә ризыкны мулдан куялар. Керәшеннәр пешерә торган ризыклар исемлеге бай һәм төрле. Алар күп төрле ашамлыклар әзерли. Иң популяр ризыклар арасында пируг, пирмәнкә, бәлеш, пәрәмәч һәм башкалар бар. Ольга Шупшина  элгәре  үз якларында пешерелгән ризыкларны искә алды:

«Безнең әбиләр пирогларны зур итеп ясыйлар иде. Бер табага икене генә салып. Чөгендер өлгергәннән соң пирогны (без пируг дибез иде), чөгендердән пешерәлар. Кызыл чөгендер, шикәр чөгендере һәм ярма белән май салып. Икмәкне дә өйдә пешергән, күп вакытта арыш икмәге. Бала-чага торганчы, шул  камырдан пич алдында утта күмәч  (өтү) пешерәлар. Өтү өстенә бәрәңге боламыгы сылап, май сөртеп, яңадан пич алдында пешереп алалар иде. Ул шундый тәмле итеп, кызарып пешә. Без аны пәрәмәч дибез. Соңрак аны бодай оны, ак оннан пешерә башладылар. Хәзер инде авылда пич булган өйдә дә сирәк калды. Күбрәк бәлешләр, пирожкилар пешерәбез».